الخط دا خطي
شعر / أحمد فؤاد نجم
الخط دا خطّي
والكلمة دي لِيّا
غطى الورق غطّي
بالدمع يا عنيّة
شط الزتون شطي
والأرض عربيّة
نسايمها أنفاسي
وترابها من ناسي
وان رُحت انا ناسي
ما تنسانيش هيّ
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصّلا والصوم
والدين فى عرف الحر
همّ ومَذلّة ومُرّ
وشجون تصون وتجُرّ
أحزان مخبية
والخط دا خطي
والكلمة دى ليا
لاكتب على كفّي
والحبر من دمي
يا همّتي كفّي
يا عزوتى ضمي
أول ما ح نوفّي
بالوعد
ح نسمّي
باسم اللى ماتوا صغار
فى المدرسة والدار
والمصنع اللي انهار
فوق الصنايعية
والخط دا خطي
والكلمة دى ليا
////////////////
الرئيسية